Kahanan Saiki

Ya kaya ngene saiki
Akeh kang ora preduli
Preduli marang kebudayane
Sing (jare) kabudayane dhewe
Nanging wong manca sing luwih nglestari
Tinimbang awake dhewe

Ayo - ayo - ayo kanca!
Padha gumregah ngadepi kemajuan iki
Aku lan sliramu dadi pengarep
Mugo bisa mujudake gegayuhaning bangsa iki

Yen ora awake dhewe, njur sapa maneh?

 

Dening: Ika Dewi Anggrayni

TANDHA MATA

senadyan ta ora mingsra
tandha mata sing taktampa
senadyan amung sepele
ngelingake kabeh lelabete

kaya rembulan lumaku
kang madhangi wanci dalu
kaya tumetesing banyu
ngadhemake kangene atiku

kae tandha mata
mratandhani ati tresna
nadyan nate gawe gela
ning nyatane mung katon neng netra

taksimpen ana kamarku
dadi sulih sliramu
taksimpen ana atiku
liya wektu bakale ketemu.

Sumber:  https://www.facebook.com/basajawa?fref=ts

UDAN WAYAH SORE


udan riwis-riwis nggawa angin gumanti

ora kaya nalika kang kawuri sing kebak pegarep-arep

dikaya ngapa lemah wus kebanjur teles

sesuk esuk yen sang surya wiwit sumunar

 lan manuk kepodang colat colot ana ing wit gedhang

tak tunggu tekamu ing sak ngisore payung

tak kanthi lakumu tumeka ngendi

mbokmenawa sesuk sore wus ora udan riwis-riwis

marakake gawe kekesing ati

manuk kepodang wus mabur mangulon

nanging tetep tak tunggu tekamu


Dening: Ika Dewi Anggrayni