Nyemak Pambagyaharja Penganten Jawa

Jejere wong jawa nduweni unggah-ungguh basa kang susila. Sakjrone upacara adat jawa ana tata urutan kang kudu dijlentrehake. Ing babagan iki upacara adat kang dibahas yaiku upacara penganten, mligine ing upacara lamaran. Kanggo miwiti nulis sambutan ing upacara lamaran kudu digatekake babagan ing ngisor iki, sengaja babagan nulis sambutan iki katulis nganggo basa krama supaya para siswa gladhen basa krama. Sebab ing kabeh micara uga tulisan kang asipat resmi kuwi amrih apike lan penere nganggo basa krama.

            Basa Jawi menika pancen saleresipun radi riwil, awit saking kathahipun lan wonten trap-trapanipun. Mila manawi kegalih kirang pas, kasuwun sampun ngantos ngginakaken tembung kang kawi ingkang dereng mangertos tegesipun. Tanggap wacana ingkang sae kedah saged ndudut rasa, pamedhar sabda anggenipun maraga saged ndudut rasa saha wibawa. Kanthi mekaten, mboten nilaraken tatakrama, miwah kasusilan. Tata krama inggih punika basa ingkang katata kacumbuhaken swasana.

            Nyerat tanggap wacana kedah nggatosaken tata krama, marsudi ing reh tata krama punika, perikedah saged mumpuni saha mengertosi.

1. Kawruh Kagunan Basa
   babagan kasusatran ingkang ngemu wedharing gagasan saking priyantun ingkang sampun pona, tinata endah.
2. Bab Basa
   basa mekaten ingkang ngemu suraos (teges), piranti kangge pasrawungan ing antawis priyantun, lan sanesipun inggih menika basa ingkang kaprah dipun mangertosi bebrayan ageng.
3. Basa Rinonce (Lagaking Basa)
   inggih punika unen-unen utawi tembung ing suraosipun langkung alus, saged milut lan dipun midhangetaken priyantun sanes, saha angel dipun tiru.
4. Traping Basa Ingkang Leres saha Sae
   pengertosan basa ingkang trep lan leres punika ngginakaken basa ingkang lugu lan lugas, luwes, lan gampil dipun tampi piyantun ingkang mirengaken.
5. Kawi Jarwa
   pratelan basa kina ingkang taksih kaginakaken ing pambiwara miwah pamedhar sabda.
   Tata urutan nyerat inggih menika:
   a. Nggatosaken acara punapa ingkang kedah dipunlampahi.
   b. Mangertos kanthi premati sinten ingkang jejibahan (ingkang kagungan kersa, besan, asma temanten, saha para utusan).
   c. Saged ngetrapake pangandikan ugi unggah-ungguh basa.
   Kangge tuladha, cobi panjenengan gatosaken tuladha pasrah paningset (ngaturake uba rampe lamaran) wonten ngandap menika!
   

Kula nuwun

Saha angambali matur, mugi kawilujengan, karaharjan, minggahipun katentreman tansah kajiwa kasarira ing hangga panjenengan sedaya lan kula. Katur para tamu kakung saha putri, para pinisepuh, lan sesepuh ingkang tansah kinabekten sumrambah dhumateng para sinedhahan ingkang tansah winengku ing pakurmatan. 

Saderengipun kawula nglajengaken atur, sumangga langkung rumiyin sesarengan kawula dherekaken manungku puja wonten ngarsa dalem pangeran ingkang maha kuwaos, ingkang ngantos titiwanci menika taksih kepareng maringaken kamirahanipun dhumateng kula lan panjenengan saged makempal wonten ing sasana pahargyan mriki kanthi manggih kawilujengan lan karaharjan sedayanipun.

Saha wonten kalodhangan punika mugi wonten keparengipun, mugi kula kalilanana matur sawatawis minangka sesulih saking panjenenganipun Bapa Anggoro Sasmaya sekalian, ingkang lumantar kawula kinen matur maligi dhumateng panjenenganipun Bapa Radite Lintang ingkang minangka sulih saking panjenenganipun ingkang hamengku damel. 

Langkung rumiyin kawula ngaturaken mugi kawilujengan saha karaharjan tansaha kasandhing wonten ngarsa panjenengan. Ing salajengipun kula kepareng matur minangkani

ingkang dados aturipun Bapa Anggoro Sasmaya sekalian, sepisan ngaturaken salam taklim mugi katur panjenenganipun Bapa Wibawa Maruta sekalian. Ing salajengipun anggen kula sowan minangka suta saraya pasrah paningset. Menggah punapa ingkang dados rerangken badhe kawula aturaken wonten ngarsa panjenengan:

1. Saperangkat sarana kangge ngadi sarira jangkep.
2. Satunggal pengadeg minangka ageman badhe pengenten putri.
3. Ageman jeningan ingkang maligi kagem badhe penganten putri.
4. Saha dlancang etangan pajeng (arta) ingkang minangka buwuh pundhutan sarem.
5. Majemukan jangkep.
6. Lan pmesing ingkang arupi sarung lan nyamping, awit badhe penganten putri taksih hanggadahi eyang jangkep.
7. Saha ing saklajengipun taksih wonten uba rampe sanesipun ingkang mboten perlu kawula sebataken. awit mbujeng wekdal.
   
   Mekaten atur kawula, wasana menggah panampi sawetahipun kasumanggaaken. Saha kegalih wonten kiranging trapsila anggen kawula matur, kula yansah hanyeyadhang lumunturing pangapunten.
   Wassalamu'alaikum Wr. Wb
   Hayu, hayu, rahayua ingkang samya pinanggih
   Nuwu.